Maamulka Xarakada Shabaab Almujaahidiin ee magaalada Kismaayo Xarunta Gobolka J/hoose ayaa bilaabay Howlgalo ay kula dagaalamayaan Burcad badeeda Soomaaliya ee ka qawleysta xeebaha ku teedsan Dalka Somalia.

Labadii maalin ee ugu dambeysay ayaa ciidamo ka tirsan maamulkaas islamarkaana ku gaashaaman tiknikada Dagaalka ayaa waxaa ay ku gaaf wareegateen xeebta ku teedsan gobolka iyagoo baadi goobaya Burcad badeeda Somalida kuwaas oo la sheegay in ay ayaamihii dambe ku soo badanayeen Xeebada Gobolka jubada Hoose.

Waxay tani Imaneysaa markii Dooni ka baxday Kismaayo islamarkaana Dhuxul u waday wadamada Carabta ay ku qafaasheen meel aan sidaasi uga fogeen Xeebta magaaladaasi taas oo ay ka daadiyeen rarkii saarnaa islamarkaana u kaxeystay badweynta si ay ugu soo afduubtaan maraakiibta ganacsiga.

Howlgaladan ay sameynayaan ciidamada Xarakada Alshabaab ee gobolka J/hoose ayaa waxaa ay yihiin kuwo uu maamulkaasi ugu danleeyahay in ay uu ku ciribtiro Burcad badeeda Deegaankaasi ku soo badanaya, iyagoo sidoo kale dad u taxaabay xabsiga kuwaas oo ay ka sooqabteen Xeebaha.

Si kastaba ha ahaatee arintan ayaa waxaa siweyn u hadal haya dadyowga Magaalada Kismaayo iyadoo la isla dhexmarayo halka ay ku soo gaba gaboobi doonaan howgalada ceynkan ah iyo xurguftan soo kala dhexgashay Maamulka Kismaayo iyo Burcad badeeda.

Max’ed Salaad Cadulle
SBC International- Kismayo.