Kumanaan Soomaali ah oo lagu tababaray gudaha dalka Kenya ayaa la sheegay inay iminka diyaar u yihiin inay ku biiraan dagaalka  Dowlada Soomaaliya  ay kaga soo horjeedo  kooxaha iyada ku kacsan ee dhawaantan sheegtay inay  taabacsan yihiin shabakada Al Qaacida, sida ilo ku dhow dhow dhinaca amaanka Kenya laga soo xigtay.

Waxaa aad usii kordhaya walaaca Beesha caalamka iyo dalalka dariska la ah dalka Somalia  ay ka qabaan khatarta sii siyaadaysa ee dhinaca isbalaarinta ah ee ay xarakada AlShabaab ay wadaan iyagoo iminkaba ka taliya deegaano  badan oo dalka kamida islamarkaana dagaal culus kula jira dowlada aan awooda sidaasi ah lahayn ee qaramada midoobay taageerada ka haysata.

Dalka Kenya ayaa laba jeer waxaa ay usoo joogtay weeraro gudaha dalkeeda laga geystay kuwaasoo lala xiriiriyay Al qaacida, iyadoo taasi jirto ayaa hadana dowlada Kenya aysan kala qayb qaadan Karin  howlgalka nabad ilaalinta midowga Africa ay ka wadaan dalka Somalia iyadoo ay ugu wacan tahay darisnimada ay la tahay Somalia, Balse dowlada Kenya ayaa balanqaaday inay samayn doonto wax walba oo ay uga hortagayso  in dalkeedu uu kusoo baaho fowdada ka jirta dalka ay ood wadaaga yihiin ee Somalia.

Xubin hore uga tirsanaan jiray Militariga dalka Kenya oo heshiis lagula galay inuu tababaro Soomaalida askari nimada isaga qortay  gobolka waqooyi bari Kenya ayaa sheegay in iminka loo baahan yahay 2,500 oo askari si loo dhamaystiro  buu yiri kormeerkoodii ugu dambeeyay inta aan dalka loo daad gurayn.

“Tababarku wuxuu ahaa mid lagu guulaystay, inkastoo qayb ka mida ragii isqoray ay xajin waayeen tababarka, waxaana ay naga tageen iyagoo koox dhisan ah” ayuu yiri Macalinkii tababarka bixinayay oo u waramayay wakaalada wararka ee Reuters.

“Waxaa loo tababaray xirfadaha dagaalka, sida hubka kala duwan loo rido, sida dhoolatusyada loo sameeyo, iyo sida loogu dulqaato dhibaatooyinka  marka dhul adag lagu dagaalamayo” ayuu  hadalkiisa sii raaciyay tababaruhu.

Wasiirka Difaaca ee dalka Kenya  Yusuf Xaaji ayaa mar uu booqanayay deegaanka Isiolo  bishii December ee sanadkii tagay waxaa uu halkaasi ka sheegay in dowlada Kenya ay tababar ku siinayso Soomaalida  deegaanada Samburu iyo xeebta labadaba.

Tababarkan ayaa waxaa uu ka soconayay meel 60km u jirta deegaanka Isiolo islamarkaana u dhow deegaanka Samburu oo caan ku ah duurjoogta  iyadoo halkaasi ay sidoo kale ciidamada Britishku u adeegsadaan marka ay samaynayaan dhoola tusyada.

C/risaaq Cismaan Bulqaas

SBC International Monitoring Cairo

ccbulqaas@gmail.com