Markab nooca dagaalka ah oo uu Ruushanku leeyahay ayaa gacanta ku dhigay  dooni ay saaran yihiin todoba Burcad badeed Soomaali ah kuwaasoo  ku guda jiray howlo afduub oo ay biyaha gacanka Cadmeed  ay rabeen inay kaga qafaashaan Markab xamuul,  sida uu sheegay afhayeen u hadlay ciidamada badda Ruush-ka ee ku sugan biyaha Somalia maanta oo sabti ah.

Markabkan laga badbaadiyay afduubka burcad badeeda oo ay leedahay shirkada  Ariella ee dalka Slovenia  ayaa waxaa saaran  15 shaqaale Philippines ah, todoba Ukrainian ah, iyo sadex kale oo u kala dhashay dalalka  Slovenia,  Bulgaria iyo India. Waxaana  ay kasoo shiraacdeen dekeda badda Madoow ku taala ee la yiraahdo Sevastopol iyagoo islamarkaana kusii jeeday dalka Indonesia.

Markabka dagaalka Ruush-ku leeyahay ee The Neustrashimy  ayaa haatan waxaa uu Markabka xamuulka ah ee The Ariella uu usii galbinayaa dhinaca Bari kadib markii ilo ku dhow dhow ciidamada Mariinis-ka Ruush-ka ay shaaciyeen in Markabka Xamuulka ah ee the Ariella uu sii wadan doono safarkiisii uu ugu socday dalka Indonesia.

Sida Ruush-ku ka yeeli doono burcad badeedan ayaan wali kala cadayn waxaana dhici karta baa la leeyahay in todobadan burcad badeeda Soomaalida lagu maxkamadeeyo dalka Ruush-ka ama lagu  wareejiyo dalalka  kale sida dalka Slovenia oo laga leeyahay markabka laga badbaadiyay ee the Ariella, iyo xitaa waxaa dhici karta in lagu wareejiyo dalalka Somalia dariska la ah sida  Kenya ama jasiirada Seychelles si loogu maxkamadeeyo.

Maraakiibta Ciidamada Badda ee Ruush-ka  ayaa ka mida kuwa sida joogtada ah ugu sugan biyaha dalka geeskan Africa ku yaala ee Somalia  waxaana ay qayb ka yihiin dhowr dal oo kale oo Maraakiib dagaal ay ka joogaan biyaha Somalia kuwaasoo dagaal  kula jira burcad badeeda.

C/risaaq Cismaan Bulqaas

SBC International Monitoring Cairo

Ccbulqaas@gmail.com